Virat Kohli : विश्वचषकातील ‘रनमशीन’, बांगलादेशविरुद्ध 37 धावा करत कोहलीने केला ‘विराट’ पराक्रम

Virat Kohli :-  बांगलादेश विरुद्ध भारत (BAN vs IND) यांच्यात शनिवारी (22 जून) अँटिग्वामध्ये झालेला टी20 विश्वचषकातील (T20 World Cup 2024) सुपर 8 सामना झाला. हा सामना जिंकत उपांत्य फेरीतील जागा निश्चित करण्याची संधी भारतीय संघाकडे होती. कर्णधार रोहित शर्मा आणि विराट कोहली (Virat kohli) यांनी भारतीय संघाला वेगवान सुरुवात करुन दिली. यादरम्यान छोटेखानी खेळी करत स्टार फलंदाज विराट कोहली याने भीमपराक्रम आपल्या नावावर केला.

बांगलादेशने नाणेफेक जिंकून प्रथम गोलंदाजीचा निर्णय घेतला आणि भारताला फलंदाजीसाठी आमंत्रित केले. प्रथम फलंदाजी करताना नेहमीप्रमाणे विराट आणि रोहित सलामीला फलंदाजीसाठी आले. रोहित आणि विराटमध्ये पहिल्या विकेटसाठी 39 धावांची भागीदारी झाली. रोहित 23 धावा करुन बाद झाला. पुढे विराट काही जोरदार फटके मारत 37 धावा करुन बाद झाला. 3 षटकार आणि एका चौकाराच्या मदतीने विराटने ही छोटेखानी खेळी केली. या खेळीसह विराटने विश्वचषक स्पर्धेत मैलाचा दगड गाठला आहे.

विराटने टी20 आणि वनडे विश्वचषक स्पर्धेत मिळून 3 हजार धावांचा टप्पा गाठला आहे. विश्वचषक स्पर्धेत तो जगातील सर्वाधिक धावा करणारा पहिला फलंदाजही आहे. विराटव्यतिरिक्त आजपर्यंत कोणत्याही फलंदाजाला हा पराक्रम करता आलेला नाही. विश्वचषक स्पर्धेत सर्वाधिक धावा करणाऱ्या फलंदाजांच्या यादीत विराटनंतर रोहितचा दुसरा क्रमांक आहे. रोहितने वनडे आणी टी20 विश्वचषकात मिळून 2637 धावा केल्या आहेत. तसेच ऑस्ट्रेलियन फलंदाज डेविड वॉर्नर या यादीत तिसऱ्या क्रमांकावर आहे आणि माजी भारतीय क्रिकेटपटू सचिन तेंडूलकर या यादीत चौथ्या क्रमांकावर आहे.

विश्वचषक स्पर्धेत सर्वाधिक धावा (ODI + T20)
3000 – विराट कोहली*
2637- रोहित शर्मा
2502 – डेविड वॉर्नर
2278 – सचिन तेंडूलकर