भारतीय फुटबॉलमधील झंझावात थांबला! Sunil Chhetri ची आंतरराष्ट्रीय कारकीर्द 19 वर्षांनी समाप्त

Sunil Chhetri Retired|भारतीय फुटबॉल संघाचा कर्णधार व सर्वकालीन महान फुटबॉलपटू सुनील छेत्री (Sunil Chhetri) याने गुरुवारी (6 जून) आंतरराष्ट्रीय फुटबॉलला रामराम केला. कोलकाता येथील सॉल्ट लेक स्टेडियम येथे झालेल्या फिफा वर्ल्डकप क्वालिफायर (FIFA World Cup Qualifier) सामन्यात भारत आणि कुवेत (INDvKUW) समोरासमोर आले होते. पूर्ण वेळेपर्यंत गोलशून्य बरोबरीत राहिलेल्या या सामन्यासोबतच सुनील छेत्री याच्या 19 वर्षांच्या आंतरराष्ट्रीय कारकीर्दीची समाप्ती झाली.

सुनील छेत्री याने तीन आठवड्यापूर्वीच आपण कुवेत विरुद्ध अखेरचा आंतरराष्ट्रीय सामना खेळणार असल्याचे जाहीर केले होते. भारतीय फुटबॉल इतिहासातील सर्वात यशस्वी खेळाडू म्हणून, नाव कमावलेल्या छेत्री याचा अखेरचा सामना पाहण्यासाठी तब्बल 59 हजार प्रेक्षकांनी सॉल्ट लेक स्टेडियम येथे हजेरी लावली. मात्र, पूर्ण वेळेनंतर दोन्ही संघांकडून एकही गोल झाला नाही. भारतीय संघाने यादरम्यान तीन संधी सोडल्या. या बरोबरीसह भारतीय संघाची स्पर्धेच्या तिसऱ्या फेरीत जाण्याचे स्वप्न जवळपास धुळीस मिळाले आहे.

मागील जवळपास दोन दशकांपासून भारतीय फुटबॉलमध्ये आपले योगदान देत असलेल्या सुनील छेत्री (Sunil Chhetri) याला सामना संपल्यानंतर आपले अश्रू रोखता आले नाहीत. प्रेक्षकांना अभिवादन केल्यानंतर भारतीय संघाने त्याला गार्ड ऑफ ऑनर देत अखेरची मानवंदना दिली. तो आता केवळ ISL मध्ये Bengluru FC साठी खेळताना दिसेल. सामन्यानंतर त्याला भारतीय फुटबॉल महासंघ व माजी खेळाडूंच्या हस्ते सन्मानित केले गेले.

छेत्री याने भारतीय संघासाठी सर्वाधिक 151 सामने खेळताना 94 गोल केले. तो फुटबॉल इतिहासात सर्वाधिक गोल करणाऱ्या खेळाडूंच्या यादीत चौथ्या क्रमांकावर राहिला. तसेच त्याच्या नावे चार आंतरराष्ट्रीय हॅट्रिक देखील जमा आहेत. भारतीय फुटबॉलला. नवीन ओळख देण्याचे श्रेय त्याला दिले जाते

(Indian Football Legend Sunil Chhetri Retired From International Football)