IND vs PAK : ज्या स्टेडियमवर भारत वि. पाकिस्तान सामना झाला, तेच स्टेडियम आता होणार उद्ध्वस्त

T20 World Cup 2024 : आयसीसीने वेस्ट इंडिज आणि अमेरिकेच्या संयुक्त विद्यमाने टी20 विश्वचषक 2024 आयोजित करण्याचा निर्णय घेतला होता, ज्यामध्ये प्रथमच आयसीसी स्पर्धेचे सामने अमेरिकेत खेळवले जाणार होते. यासाठी आयसीसीने सुरुवातीला फ्लोरिडा आणि टेक्सासचे मैदान निवडले होते, मात्र नंतर हे सामने न्यूयॉर्कमधील नासाऊ काउंटी आंतरराष्ट्रीय क्रिकेट स्टेडियममध्ये खेळवण्याचा निर्णय घेण्यात आला. मात्र हे स्टेडियम फलंदाजीसाठी अतिशय कठीण असून येथील खेळपट्टीवर गोलंदाजांचे वर्चस्व दिसून आले आहे. त्यामुळे सातत्याने या स्टेडियमवर प्रश्न उपस्थित केले जात आहेत. यादरम्यान आता हे स्टेडियम तोडण्याचा निर्णय झाला आहे.

आयसीसीने नासाऊ काउंटी स्टेडियम तयार करण्यासाठी सुमारे 248 कोटी रुपये खर्च केले होते, ज्यामध्ये क्रिकेटचे पहिले मॉड्यूलर स्टेडियम तयार करण्यात आले होते. आता 12 जून रोजी भारत आणि अमेरिका यांच्यातील सामना स्टेडियममध्ये खेळवण्यात आल्यानंतर ते पाडण्याची प्रक्रियाही सुरू करण्यात आली आहे.

नासाऊ काउंटी स्टेडियम 106 दिवसात पूर्ण झाले
नासाऊ काउंटी आंतरराष्ट्रीय क्रिकेट स्टेडियमचे बांधकाम सप्टेंबर 2023 मध्ये सुरू झाले, त्यानंतर ते 106 दिवसांत पूर्ण झाले होते. आता हे स्टेडियम अवघ्या 6 आठवड्यांत पाडले जाणार आहे. या स्टेडियमचे आयझेनहॉवर पार्क, या जुन्या स्वरुपात रूपांतर केले जाईल, ज्यामध्ये लोक कोणत्याही निर्बंधांशिवाय आत आणि बाहेर जाण्यास सक्षम असतील. खेळपट्ट्यांबाबत काय निर्णय घेतला जाईल? याबाबत अद्याप काहीही ठरलेले नाही. आयसीसीच्या म्हणण्यानुसार, नासाऊ काउंटीच्या अधिकाऱ्यांनी यावर निर्णय घ्यायचा आहे. जर त्यांनी खेळपट्टी सुरक्षित ठेवण्याचा निर्णय घेतला तर त्यांनाच त्याची देखभाल करावी लागेल. जर त्यांनी खेळपट्टीही बदलायचे ठरवले तर, आयसीसी ड्रॉप-इन खेळपट्ट्या परत रिलोकेट करेल.

#WATCH | Nassau County, New York (USA): Bulldozers placed at the Nassau Cricket Stadium as the temporary stadium is set to be dismantled from tomorrow.

The T20 World Cup match between India and the US yesterday was played here. pic.twitter.com/iYsgaEOWlP

— ANI (@ANI) June 13, 2024

टी20 विश्वचषक 2024 मध्ये येथे 8 सामने खेळले गेले
टी20 विश्वचषक 2024 चे एकूण 8 सामने न्यूयॉर्कमधील नासाऊ काउंटी इंटरनॅशनल क्रिकेट स्टेडियमवर खेळले गेले, ज्यामध्ये गोलंदाजांचे पूर्ण वर्चस्व दिसून आले. या मैदानावरील सर्वोच्च धावसंख्या एका डावात 137 धावांची होती, जी कॅनडा संघाने आयर्लंडविरुद्धच्या सामन्यात केली होती. या 8 सामन्यांमध्ये लक्ष्याचा पाठलाग करणाऱ्या संघाने 5 वेळा सामना जिंकला, तर केवळ 3 सामन्यात प्रथम फलंदाजी करणाऱ्या संघाला विजय मिळवण्यात यश आले आहे. येथे, भारतीय संघाने तीन सामने देखील खेळले, त्यापैकी एका सामन्यात त्यांनी आयर्लंडचा 8 विकेट्सने पराभव केला, यानंतर, दुसऱ्या सामन्यात भारताने पाकिस्तानचा 6 धावांनी पराभव केला, तर संयुक्त यजमान अमेरिकेवर भारताने 7 विकेट्सने विजय मिळवला.