Paris Olympics साठी भारताचा कुस्ती संघ जाहीर, पाहा कोण आहेत गोल्डचे दावेदार

Indian Wrestlers In Paris Olympics|खेळांचा कुंभमेळा म्हणून ओळखल्या जाणाऱ्या ऑलिंपिक स्पर्धा यावर्षी फ्रान्सची राजधानी पॅरिस (Paris Olympics 2024) येथे होत आहेत. या स्पर्धेसाठी आता भारताच्या कुस्ती संघाची घोषणा झाली आहे. यंदा ऑलिंपिकमध्ये भारताचे केवळ सहा कुस्तीगीर सहभागी होणार असून, यामध्ये केवळ एक पुरुष कुस्तीगीर आहे. हे सर्व कुस्तीगीर फ्रीस्टाइल कुस्तीच्या विविध वजनी गटात भाग घेतील.

The Indian wrestling squad is out now!🤩

For the very first time 5⃣ women wrestlers are set to compete in the Olympic Games. The 6️⃣ grapplers present in the squad are a combination of youth and experience. 🫡

Be prepared to experience some action-packed moments at the Grand… pic.twitter.com/GvGT24KR1O

— SAI Media (@Media_SAI) May 24, 2024

भारतीय कुस्ती क्षेत्र मागील दोन वर्षांपासून चर्चेत राहिले आहे. भारतीय कुस्ती महासंघाचे माजी अध्यक्ष बृजभूषण सिंग यांच्यावर काही महिला खेळाडूंनी लैं’गिक शोषणाचे आरोप केले होते. खेळाडूंनी मोठ्या प्रमाणात आंदोलने केल्यानंतर त्यांना आपले पद सोडावे लागले. तसेच खेळाडूंच्या ट्रायल्सबाबतही मोठा वाद झाला होता. या सर्वाचा परिणाम म्हणून केवळ सहा कुस्तीगीर ऑलिंपिकसाठी पात्र ठरले.

एकमेव पुरुष कुस्तीगीर असलेला अमन सेहरावत 57 किलोग्राम फ्रीस्टाइल वजनी गटात खेळेल. अनुभवी महिला कुस्तीपटू विनेश फोगट (Vinesh Phogat) 50 किलोग्राम फ्रीस्टाइल, निशा दहिया 68 किलोग्राम फ्रीस्टाइल, अंशू मलिक 57 किलोग्राम फ्रीस्टाइल, रितिका हुडा 76 किलोग्राम फ्रीस्टाइल व युवा अंतिम पंघल (Antim Panghal) 53 किलोग्राम फ्रीस्टाइल वजनी गटात खेळताना दिसणार आहे.

टोक्यो ऑलिंपिक 2020 मध्ये पदक जिंकणारे बजरंग पुनिया (Bajrang Punia) व रवी दहिया (Ravi Dahiya) यावेळी पात्र ठरू शकले नाहीत. भारताने आतापर्यंत ऑलिंपिकमध्ये कुस्ती खेळात 7 पदके जिंकली आहेत. भारताला ऑलिंपिक इतिहासात मिळालेले पहिले वैयक्तिक पदक खाशाबा जाधव (Khashaba Jadhav) यांनी 1952 हेलसिंकी ऑलिंपिकमध्ये जिंकून दिले होते. त्यानंतर सुशील कुमार याने 2008 बीजिंग ऑलिंपिकमध्ये कांस्य व 2012 लंडन ऑलिंपिकमध्ये रौप्य पदक जिंकलेले. याव्यतिरिक्त योगेश्वर दत्त याने 2012 मध्येच कांस्यपदक आपल्या नावे केलेले. तर ऑलिंपिकमध्ये भारताला महिला कुस्तीत एकमेव पदक साक्षी मलिकने 2016 रिओ ऑलिंपिकमध्ये कांस्य पदकाच्या रूपाने दिले होते.

(India Wrestling Sqaud For Paris Olympics 2024 6 Wrestlers With Vinesh Phogat)