T20 World Cup 2024| युएसएची तगडी झुंज अपयशी, दक्षिण आफ्रिकेचा सुपर 8 मध्ये पहिला विजय, रबाडा ठरला हिरो

 

टी20 विश्वचषक 2024 (T20 World Cup 2024) मध्ये सुपर 8 फेरीचा पहिला सामना दक्षिण आफ्रिका व युएसए (SA vs USA) यांच्या दरम्यान खेळला गेला.‌ ऍंटिगा येथे झालेल्या या सामन्यात युएसए संघाने दक्षिण आफ्रिका संघाला चांगली झुंज दिली. मात्र, अखेरच्या षटकांत दक्षिण आफ्रिकेच्या गोलंदाजांनी आपला अनुभव दाखवत 18 धावांनी सामना जिंकून दिला.

यूएसए संघाने या सामन्यात नाणेफेक जिंकून दक्षिण आफ्रिकेला फलंदाजासाठी आमंत्रित केले. रिझा हेन्ड्रिक्स लवकर परतल्यानंतर क्विंटन डी कॉक व कर्णधार ऐडन मार्करम यांनी युएसएच्या गोलंदाजांचा खरपूस समाचार घेतला. दोघांनी दुसऱ्या गड्यासाठी अवघ्या 60 चेंडूंमध्ये 110 धावांची वेगवान भागीदारी केली. डी कॉक याने 40 चेंडूंमध्ये 40 चेंडूंमध्ये 7 चौकार व 5 षटकारांच्या मदतीने 74 धावा केल्या. तर, मार्करमने 46 धावांचे योगदान दिले. तर मिलर मात्र खातेही खोलू शकला नाही.

यानंतर हेन्रिक क्लासेन व ट्रिस्टन स्टब्स यांनी डावाची सूत्रे हातात घेत फटकेबाजी सुरू केली. दोघांनी अनुक्रमे 36 व 20 धावा केल्या. यूएसए साठी सौरभ नेत्रावळकर व हरमीत सिंग यांनी प्रत्येकी दोन बळी मिळवले.

विजयासाठी मिळालेल्या 195 धावांचा पाठलाग करताना स्टीव्हन टेलर व ऍंड्रीस गौस यांनी संघाला 33 धावांची वेगवान सलामी दिली. मात्र, टेलर याच्यानंतर नितीश कुमार व कर्णधार जोन्स स्वस्तात बाद झाले. कोरी ऍंडरसन देखील फक्त 12 धावा करू शकला. तर शायन जहांगीर यांनी देखील तीन धावा केल्या. जहांगीर बाद झाला तेव्हा संघाची अवस्था 5 बाद 76 अशी होती.

यानंतर गौस व हरमीत सिंग यांनी दक्षिण आफ्रिकेच्या गोलंदाजांवर प्रतिहल्ला चढवला. हरमीतने केवळ 22 चेंडूंमध्ये 38 धावा करत सामन्यात रंगत आणली. मात्र अखेरच्या दोन षटकात विजयासाठी 28 धावांची गरज असताना कगिसो रबाडा याने केवळ तीन धावा देताना हरमीतला बाद केले. त्यानंतर नॉर्किए याने देखील अखेरचे षटक शिस्तबद्ध टाकत संघाला 18 धावांनी विजय मिळवून दिला. गौस 47 चेंडूंमध्ये 80 धावा करत नाबाद राहिला. यामध्ये प्रत्येकी पाच चौकार व पाच षटकारांचा समावेश होता.‌ क्विंटन डी कॉक सामनावीर ठरला.

(T20 World Cup 2024 SA Beat USA)