Womens Kabaddi World Cup 2025: भारतीय महिलांचा सलग दुसरा विजय, यजमान बांगलादेशचा उडवला धुव्वा

Womens Kabaddi World Cup 2025: भारतीय महिला कबड्डी संघाने बांगलादेश येथे सुरू झालेल्या दुसऱ्या महिला कबड्डी  विश्वचषक स्पर्धेत सलग दुसरा साखळी विजय मिळवला. त्यांनी त्यांनी यजमान बांगलादेशला 43-19 असे नमविले. आक्रमक सुरुवात करीत भारताने 7 व्या मिनिटाला लोण देत 12-5 अशी आघाडी घेतली. पुन्हा 14 व्या मिनिटाला लोण देत आपली आघाडी 28-8 अशी वाढविली. मध्यंतराला 29-9 अशी आघाडी भारताकडे होती. उत्तरार्धात सावध खेळ करीत मध्यांतरानंतर 17 व्या मिनिटाला आणखी एक लोण देत आपली आघाडी 42-15 अशी भक्कम केली.

Womens Kabaddi World Cup 2025 India Won 2 Matches

आजच्या खेळाचे वैशिष्ट म्हणजे बांगलादेश संघाने पूर्वार्धात एक व उत्तरार्धात एक अशा दोन अव्वल पकड केल्या. भारताच्या संजुदेवीने 6 चढाया करीत 1 बोनस गुणसह 4 गुण मिळविले. उत्तरार्धात तिला आराम दिला. पूजाने 4 चढायात 2 बोनस व 3 गुण प्राप्त केले. सोनाली शिंगटेने 4 चढायात 2 बोनस व 3 गुण मिळविले. पुष्पाने 6 चढाया करीत 2 बोनस व 3 गुण मिळविले. एकदा तिची अव्वल पकड झाली. 12 नंबरच्या खेळाडूने 5 चढायात 4 गुण व 1 बोनस गुण मिळविला. नंबर 2 च्या खेळाडूने 6 चढाया करीत 4 गुण घेतले. एकदा तिची अव्वल पकड झाली. बांगलादेशकडून 3 नंबरची खेळाडू चांगला खेळ करताना दिसली. या सामन्यात देखील भारताने सर्व राखीव खेळाडूंना खेळण्याची संधी दिली.

भारतीय संघाने आपला पहिला सामन्यात थायलंडला पराभूत केले होते. भारत आपल्या गटात आणखी दोन साखळी सामने जर्मनी व युगांडा यांच्याविरुद्ध खेळेल. दोन्ही गटातील अव्वल दोन्ही संघ उपांत्य फेरीत प्रवेश करतील. तर, अंतिम सामना 24 नोव्हेंबर रोजी होईल.

जॉईन करा क्रीडा कॅफेचा व्हॉट्सअप ग्रुप

हे देखील वाचा: 19 November भारतीयांच्या मनातील भळभळती जखम! दोन वर्ष कटू आठवणींची